寵物傳心服務

HK$511.00

溝通可以為一段關係帶來更正面效果,透過動物傳心,可以幫你了解動物的想法,進行輔導、傳遞想法給寵物,彼此之間達到共識,令雙方的關係變得更加融洽

無論家庭發生問題想了解寵物的想法,或是寵物突然發生各種行爲問題、反應異常、病重、走失等都十分推薦選用動物傳心服務,只需一張近照及少量基本背景資料,便能知道寵物心中真正想法,令你對自己的寵物更加了解,拉近彼此之間的距離。

 

所需資料:

  • 寵物正面近照一張
  • 基本資料:動物姓名、性別、年齡、提問者與寵物的關係
  • 寫下想問的問題以及想傳達的說話


收費:

每隻寵物

可提問大約五至六條問題,以及一段想傳達給寵物的說話

(問題數量不限,但動物就如小朋友一樣,太多問題會令牠們失去耐性,拒絕溝通,問題理想數量為每次56條, 大約一星期左右以 Whatsapp 語音留言形式回覆寵物主人傳心師 李若希 Karen Lee 與寵物的對話)

 

動物傳心個案分享1:雪雪&Popeye

Part I

雪雪和Popeye是兩隻性格完全相反的貓貓。 雪雪性格比較驕傲冷酷, Popeye 則是一隻嬌嗲,愛撒嬌的毛小孩。

客人想知道兩隻寵物對彼此的想法,傳心師選擇先同雪雪溝通,了解雪雪的想法,以下為與雪雪溝通的對話:

傳心師李若希 Karen Lee: 雪雪你好,可唔可以同你傾下計呀?

雪雪: 傾偈?我同你冇乜嘢好講喎

傳心師李若希 Karen Lee 唔好咁啦,睬下我啦, 係你爸爸想我同你傾下偈,睇下你有咩需要㗎

雪雪:Ok,咁你有乜快啲講,我好眼瞓,你唔好煩住我

傳心師李若希 Karen Lee:爸爸想我問下你,生活上有冇咩唔滿意又或者有咩需要呀?

雪雪:都冇啦,樣樣都好好。係嗰隻嘢煩啲囉(嗰隻嘢係指Popeye😅

傳心師 李若希 Karen Lee: 係咩?乜佢好煩咩?點樣煩親你呀?

雪雪:嗰隻嘢成日扮嬌俏,成日都要同我爭daddy 佢好煩囉。其實佢乖乖哋黐住N姐姐 (主人E先生女朋友) 咪好囉,做乜係要同我爭daddy

傳心師李若希 Karen Lee:原來係咁。另外爸爸想知道你平時做乜會最開心?

雪雪:做乜會最開心?黐實爸爸,黐到實一實,我就最開心。

傳心師李若希 Karen Lee:咁你身體有冇邊度唔舒服?

雪雪:都冇乜特別啦,不過係覺得個肚脹住脹住囉。同埋成日都覺得好攰,其實我真係好眼瞓,你冇乜嘢真係唔好再煩住我,我要瞓覺

傳心師李若希 Karen Lee:咁好啦,我都唔阻住你啦,你快啲去瞓覺啦,拜拜

傾完幾句之後,我們都覺得雪雪真係好有性格。

 

Part II

與雪雪溝通完後,我們便轉向Popeye溝通,原本很擔心Popeye會像雪雪一樣因為眼訓而拒絕溝通,怎料才一connect,我們的傳心師還未開口,Popeye已經搶著要投訴。

Popeye:好偏心,好偏心,我話畀你知爸爸真係好偏心㗎

傳心師李若希 Karen Lee:明白明白,你唔好咁激動住 (呢一刻我個心都激動到嘭嘭聲),可唔可以話畀我聽發生咩事?

Popeye:好偏心好偏心,爸爸淨係錫晒嗰隻雪雪唔理我㗎,好傷心

傳心師李若希 Karen Lee(呢一刻其實我個心入面都感覺到一種好委屈嘅感覺) 唔會啦,爸爸今次咪特登請我嚟同你傾下偈,睇下你有乜嘢需要囉

Popeye:需要?咪就係要爸爸錫我囉。我要佢抱實我,攬實我,錫晒我。雖然我都有N姐姐錫,但係佢唔可以代替爸爸㗎嘛,我都要爸爸成日抱住我,錫晒我。嗰隻雪雪,持住自己有病,扮晒嘢,成日都霸住爸爸,激死我喇。好偏心好偏心

傳心師李若希 Karen Lee:除咗呢樣嘢之外,你身體有冇唔舒服?

Popeye:咪話畀佢知我覺得佢好偏心囉,身體冇唔舒服喎,我不知幾健康

傳心師李若希 Karen Lee:咁好啦,我應承你我會代你話畀爸爸知,我哋今日就傾到呢度為止啦, 唔該晒你,bye bye Popeye

Popeyebye bye

 

後記:傳心師與寵物溝動後與客人傳達,才發現原來雪雪有腎病,由於剛患尿道炎的緣故,令雪雪經常感到肚皮易感到腫脹,以及易累、睏倦等。正正因為雪雪的病情,客人將大部分時間、精力都放於雪雪身心,令Popeye覺得爸爸偏心。

經過是次溝通,客人知道自己近來的疏忽引來Popeye不快,並答應以後會分配更多時間陪Popeye,希望令主人與寵物之間的關係更加融洽。

 

Part III

幾日之後,傳心師再收到客人電話,原來雪雪剛看完醫生,被告知只剩下半年壽命

由於雪雪今年已經18歲,由於雪雪討厭打針的關係,客人不想再每天替雪雪注射皮下水,打算讓雪雪舒舒服服享受餘下的時光,所以委託傳心師看看雪雪有沒有甚麼事情特別想做、想食,希望在這段時間盡量滿足雪雪的需要


傳心師李若希 Karen LeeHello雪雪又係我呀,你記唔記得我呀?

雪雪:記得,你今次又搵我做乜?

傳心師李若希 Karen Lee:是咁的,爸爸想我問下你近來有乜嘢特別想做同埋有乜嘢想食?

雪雪:特別想做?冇喎,咪黐住爸爸囉,黐住佢我就好開心㗎啦

傳心師李若希 Karen Lee:咁你鍾意食啲乜呢?

(其實雪雪並無回答我呢個問題,不過喺我腦海入面就不其然見到一條紅色嘅雪條)

傳心師李若希 Karen Lee:你想食雪條?

雪雪:係呀,同爸爸一齊食,你一啖我一啖,好好味,好開心㗎

傳心師李若希 Karen Lee:好啦,咁姐姐幫你話畀爸爸知啦。另外你有冇唔舒服呀?

雪雪:都係咁啦,冇乜特別,不過成日都好眼瞓囉

傳心師李若希 Karen Lee:咁好啦,我唔阻住你去瞓覺啦,你快啲瞓休息下啦

雪雪:bye bye


後記:與客人傳達與雪雪的對話後,發現原來雪雪本來已經很喜歡食雪條,聽完後,客人亦立即去買了雪條給雪雪食,希望雪雪餘下的時間可以過得舒舒服服,開開心心。


動物傳心個案分享2Cotton

Cotton是一隻在日本出生,於5個月大的時候移民到溫哥華的秋田犬。由於生活環境突然改變,到溫哥華後便病了大約七至八個月,亦產生很多行為問題。客人委託傳心術師最主要的目的是希望了解Cotton現在的生活狀況以及了解牠的一些行為問題背後原因。

 

傳心師 李若希 Karen Lee: Cotton 你好,可以同你傾下計嗎?

Cotton 我唔識你㗎噃

傳心師李若希 Karen Lee 我係你爸爸請我嚟同你傾下計,睇下你有乜嘢需要㗎

Cotton 哦,知道

傳心師李若希 Karen Lee 而家同爸爸一齊喺呢度生活,開唔開心呀? 有冇特別掛住嘅人?

Cotton ok啦,冇乜特別。但係佢成日都唔理我,我有啲悶囉。我冇特別掛住嘅人喎,同爸爸一齊已經好開心

傳心師李若希 Karen Lee 明白,等我一陣幫你話畀爸爸知,叫佢改善下

傳心師李若希 Karen Lee 爸爸想我問下你,點解每次食飯都要佢用匙羹一啖一啖餵,你先肯食?

Cotton 呢個時間爸爸最錫我,放最多注意力喺我身上。係呀,佢唔餵我,我係唔會食飯㗎 (語氣好堅決)。因為呢個時間係我同爸爸最親密嘅時間,我最鍾意爸爸為我餵飯

傳心師李若希 Karen Lee 點解你每次出街,見到畀你細小嘅狗仔,你都要撲埋去咬佢哋?你知唔知咁樣做係唔啱㗎?

Cotton 哼!嗰啲細狗扮晒嘢,懶可愛,其實就惡到死。我以前都畀佢哋咬過啦,好痛㗎,不過你哋唔知咋嘛,爸爸都唔記得咗喇。我係好憎佢哋,我每次見到佢哋我都要咬佢哋

傳心師李若希 Karen Lee Cotton你要明白唔係每一隻細狗都係咁惡嘅,而且事情已經過咗去,你亦都已經大個仔,唔會再有其他狗狗蝦你,我哋應該要同其他狗狗一齊和平共處㗎嘛,如果唔係去到公園就冇狗狗陪你玩㗎啦

Cotton 我唔理,總之我就係好憎啲細狗,我一定唔會放過佢哋

傳心師李若希 Karen Lee 但係你咁做爸爸會好擔心你喎,不如咁啦,下次見到啲細狗,唔好啋佢哋,唔好理佢哋,咁咪算囉,好唔好?

Cotton ( 語氣非常不情願 ) Um……..我試下啦,不過我唔保證我忍得住㗎

傳心師李若希 Karen Lee 你願意嘗試就一定得,Cotton真係乖。你身體有冇唔舒服?

Cotton:冇乜特別啦,不過我後面左腳有啲痛囉,都痛咗好耐㗎喇

傳心師李若希 Karen Lee 明白,咁我再幫你話畀爸爸知啦。Cotton今日唔該晒你,你繼續去玩啦,我走喇拜拜


後記:Cotton是一隻性格比較執著的狗狗,加上環境曾經突變,亦令牠變得異常敏感。傳心師把Cotton的想法傳遞給客人知道之後,突然想起原來Cotton小時候真的被一隻Bullmastiff puppy咬傷過,亦由那時開始,Cotton對細小狗隻變得有攻擊性。要改善餵飯以及攻擊的問題,傳心師相信需要花一段時間,慢慢再和牠溝通,情況才能得以改善。客人承諾在家的時候會多陪伴Cotton,亦已為腳痛問題帶Cotton求醫,希望在不久的將來可以痊癒。


動物傳心個案分享3 Guru

Guru是一隻有著大哥哥風範,很乖很淡定的中年柴犬。客人發日近日Guru悶悶不樂,希望動物傳心師可以幫忙,找出Guru近日心情低落的原因,以及看看生活上有沒有其他需要改善的地方。


傳心師 李若希 Karen Lee Hello Guru,你好嗎?

Guru 我認得你,好耐冇見

傳心師李若希 Karen Lee 係呀,今次搵你傾計最主要係媽媽想問你點解呢輪成日都唔開心?悶悶不樂,係咪唔舒服?

Guru 我冇唔舒服呀,我都冇唔開心。不過我係擔心爸爸囉,因為佢唔開心,所以我好擔心佢

傳心師李若希 Karen Lee 明白,不過其實你唔使咁擔心啦,爸爸好叻㗎,佢會識得解決自己嘅問題,唔使咁擔心佢喎。你係咪都認同爸爸好叻先?

Guru 爸爸梗係叻啦,不過我真係好錫佢,所以我忍唔住要擔心囉

傳心師李若希 Karen Lee 放心啦,爸爸嘅係小問題,佢一定會自己搞得掂,你唔開心,佢哋仲擔心你啦

Guru 咁又係

傳心師李若希 Karen Lee 係喎,媽媽同我講你成日都唔肯乖乖食飯,點解呀?

Guru 因為我唔鍾意食飯囉,我真係好憎食飯㗎。我淨係鍾意食零食,我夠飽㗎喇

傳心師李若希 Karen Lee 但係你淨係食零食唔夠營養㗎喎,唔食飯,食肉、意粉同薯菜好唔好?

Guru 唉,都好啦,總言之唔好食飯就得

傳心師李若希 Karen Lee 另外又想問下你,去到C姐姐屋企,鍾唔鍾意同佢隻小狗玩?

Guru 哎呀,梗係唔鍾意啦。嗰個小朋友好煩㗎,不停喺我身邊轉嚟轉去,要我陪佢玩

 

傳心師突然見到一個畫面:Guru開心地在草地上面跑,跟爸爸一起玩波波


傳心師李若希 Karen Lee 你係唔係好想去公園玩呀?

Guru 係呀,我好耐冇去過啦,你可唔可以叫爸爸媽媽帶我去?

傳心師李若希 Karen Lee 明白,我會將你嘅心聲話畀媽媽知。你都要記住要開心番啦,爸爸嗰啲小問題你唔需要去擔心,知道未?

Guru 知道喇

傳心師 李若希 Karen Lee Bye bye Guru


後記: 同客人溝通後,了解到男主人近來因為工作上出現一些小問題而導致心情低落,從而影響到Guru的情緒,亦因為工作忙碌,所以已有一段時間未能來Guru到公園玩。客人知道Guru討厭食飯後,決定以後多以肉、意粉同薯菜為主糧,令Gurr改善食飯問題,維持所需營養。C朋友家裏的小狗只有五、六個月大,所以十分跳皮貪玩,而Guru個性一向比較沉靜,所以顯得有點抗拒。 經溝通後,主人決定以後去C朋友家都盡量少帶Guru 怕被幾個小狗激怒🤣🤣


動物傳心個案分享4 Tang Tang

Tang Tang是一隻歲半的牧羊犬,非常活潑好動,家中成員除了父母外,另有一隻約9歲的比熊哥哥 - Sean

客人G小姐想找傳心師了解Tang Tang一些日常比較奇怪的行為和對它某些行為作出糾正。

傳心師李若希 Karen Lee Tang Tang 你好呀,我是你媽媽的朋友,可以同你傾下計嗎?

Tang Tang:好呀,你想傾乜?

傳心師李若希 Karen Lee 媽媽想我問下你點解成日都要自己一個喺廁所,唔出廳唔睬人?係唔係因為唔開心?成日自己一個喺廁所會唔會覺得好孤獨?

Tang Tang 吓?點解會唔開心😲?我最鍾意留喺廁所,喺廁所瞓覺好舒服㗎

傳心師李若希 Karen Lee 係咩?乜係廁所瞓覺會好舒服㗎咩?

Tang Tang 係呀,因為廁所好香㗎,香噴噴,我好鍾意呢陣味

傳心師李若希 Karen Lee 廁所好香?點解唔出廳?廳都一樣香㗎

Tang Tang (用好藐視嘅語氣😏😏) 你就真係唔明啦,廁所嘅香味同廳唔同㗎,廁所香好多。我最鍾意就係喺廁所瞓覺。你可唔可以同媽媽講,我瞓緊覺嘅時候唔好叫我出廳

傳心師李若希 Karen Lee 😅Ok 明白。媽媽又想問下你覺得屋企人點?一齊開唔開心?

Tang Tang 開心,梗係開心啦。我知道個個都好錫我,特別係Sean哥哥,佢好好,好叻㗎,又會保護我,佢真係好叻㗎😍

傳心師李若希 Karen Lee 開心就好啦,咁工人姐姐錫唔錫你呀?

Tang Tang (語氣有啲不屑🙄🙄) 佢冇對我唔好,不過我知佢唔係真心錫我,佢係扮出嚟嘅

傳心師李若希 Karen Lee 點解咁講呀?佢打過你?

Tang Tang 佢冇打過我,不過我就係知囉,Sean哥哥都知㗎

傳心師李若希 Karen Lee Ok但係如果將來姐姐蝦你,你要話比我知,明白嗎?

Tang Tang 明白

傳心師李若希 Karen Lee 媽媽話比我知你好鍾意同Sean哥哥玩。但係想提醒你下次可唔可以斯文啲,唔好再大力跑去哥哥度撞低佢。你要明白哥哥已經年紀大,體型又冇你咁大隻,佢承受唔到會好容易受傷㗎

Tang Tang (無辜嘅語氣😲😲) 會受傷? 點解會受傷? 我只想同佢玩,我唔會傷害哥哥㗎

傳心師李若希 Karen Lee 我哋當然明白啦,所以而家咪提醒你,叫你以後同哥哥玩要斯文啲,小心啲

Tang Tang 好啦,我知道啦,我都唔想哥哥有事

傳心師李若希 Karen Lee 媽媽最後想我問你,點解每一次佢出街你都要不停吠佢?

Tang Tang 梗係要啦,我要提醒媽媽佢一定要記得返屋企,我唔講佢會唔識得返屋企㗎。呢樣係好重要,我一定要叫媽媽記得快啲返屋企陪我 (無限loop媽咪返屋企係好重要)

傳心師李若希 Karen Lee 其實呢,媽咪係一定會識得返屋企㗎。你唔使每一次都提佢,媽媽做完嘢就會返屋企陪你㗎啦。所以你唔需要每次媽媽出門口嘅時候都同佢講,你明白嗎?

Tang Tang 係咪真㗎🤔🤔?咁好啦,我唔提佢啦。但係佢係咪真係會識得返屋企㗎?

傳心師李若希 Karen Lee 係,肯定

Tang Tang 咁好啦。其實姐姐你講完未呀?我好眼瞓😴,想去瞓覺

傳心師李若希 Karen Lee Ok Ok,咁你快啲去瞓覺啦,拜拜Tang Tang


後記:Tang Tang連接後,發覺牠其實是一隻精靈活潑又有少少招積的小狗。事後與客人溝通後,才了解到原來客人有一個十分寬敞的洗手間,而裏面亦放置很多香薰精油,真是如Tang Tang所說,十分香噴噴。主人亦提及Sean哥哥很有靈性,會主動保護弟弟,亦會對牠十分忍讓,所以兩兄弟感情十分好。

隔一後時間後與客人再跟進情況,發現之從上次與Tang Tang作溝通後,TangTang已經沒有再去撞哥哥,玩耍時斯文了很多,當客人出門時,已沒有再狂吠,果然Tang Tang真是一個聽話的小朋友呢。



動物傳心個案分享5 龜龜

今次動物傳心個案嘅主角是一隻龜龜,客人請傳心師最主要的原因是因為龜龜近來有點異常的行為生活,客人想了解一下龜龜有沒有甚麼特別的需要,以及認為目前的生活開不開心等。

傳心師李若希 Karen Lee 一與龜龜連接後,便聽到龜龜不停講,「我唔鍾意成日都浸住喺水到,可唔可以畀個大啲嘅盆我?個盆要有一個台階,當我唔想浸喺水度嘅時候,可以喺上面休息。個盆太細啦,我要一個大啲嘅盆。仲有呀,我好熱呀,好熱好熱。」


後記: 傳心師 李若希 Karen Lee事後與同客人溝通,客人亦發現龜龜近期一直不停想爬出去,似乎不想再留於盆內。另外客人其實也覺得現在使用的盆對龜龜來說尺寸偏細,打算為龜龜買一個較大的盆,經與動物傳心溝通後,客人現在應該知道如何為龜龜挑選合適的盆,為龜龜帶來舒適的生活環境。至於熱的問題,原來是因為當客人夫婦每天外出上班時,都會關上家中冷氣,令龜龜感到焗熱,希望客人可以盡快想到解決方法,令龜龜在家中可以更舒適啦。

 
傳心師李若希 Karen Lee 擁有NGH 註冊催眠治療師,ICRT Usui Reiki with Holy Fire國際認證和臼井聖火靈氣治療師資格。藉著引導能量到受者身體,藉以提升免疫能力、舒緩病痛,讓能量回復平衡。同時藉著把靈氣直接導入受者的心理或靈性層面,可治癒及調和心靈或情緒層次的問題。店主同時熱衷於塔羅占卜超過10年,尤其擅長替客人占卜愛情、事業和人際關係。近年開始研習動物傳心術,發現原來跟寵物溝通,不只可以幫助小動物表達自己的喜惡,更可以幫助主人更好地了解寵物的需要,讓寵物跟主人的心聯繫起來,一起享受更美滿的生活。

 

熱賣產品 


Grower's Cup Coffeebrewer - Mexico 啡農杯便攜式手沖墨西哥咖啡包

Awesome Alb【限時瘋搶】Deep Valley Biodynamic 有機咖啡套裝(自選三包)

Balmonds Skin Salvation Balm 天然深層保濕軟膏 120ml

  

Ethique - 「The Guardian 永願的守護者」 乾燥、捲髮或受損髮質專用護髮芭 (60g)(限時特價)